Árskógsströnd

Í fornritum mun Árskógur fyrst nefndur í sögu Reykdæla og Víga-Skútu (um 970) og þá talinn á Galmaströnd sem þá hefur talist út að Þorvaldsdalsánni. Í sögu Guðmundar dýra (Sturlungu) meira en tvö hundruð árum síðar er bærinn enn nefndur Árskógur en þá er líka tilgreindur Árskógur inn ytri (Litli-Árskógur) svo að Árskógur inn syðri hefur þá verið nafn staðarins. Hið mikla rit Guðbrandar Hólabiskups - Bréfabókin - sem tekur yfir tímabilið 1570-1625 sýnir og sannar að þá hefur verið í gildi nafnmyndin Staðárskógur (Staðar-Árskógur). Staðar- orðstofninn er þá notaður til aðgreiningar frá hinum bæjunum því öldum saman, frá því á 12. öld voru kirkjubæir kallaðir Staðir og varð slíkt ekki misskilið. Jarðabók Árna Pálssonar og Páls Vídalíns 1712 segir svo: "Stærre ár skógur kallast af sumum Stadar ár skógur og í þriðja lagi Árskógur". Frá þeim tíma fer að festast í málinu sú nafnmynd sem nú er í gildi.